بصوا يا جماعه اصل الموضوع كبير
اول حاجه علشان تكلم بنت فى موضوع ارتباط
اول مره تكلمها فيها شوف الحوار هيبقى عامل ازاى
الولد : لو سمحتى معاكى المحاضرات الى فاتت
البنت : لأ والله بس لو عايزها ممكن اجيبهالك بكره من صحبتى
الولد : طيب لو سمحتى ممكن اخد رقم موبايلك علشان افكرك تيجبيها
البنت : لأ مش هنسى وعلى العموم انا مش بعطى رقم موبايلى لأى حد
بتشتغله طبعا
الولد : على العموم براحتك بس يا ريت بكره متنسيش المحاضرات
وعلى فكره المحاضرات اساسا معاها وكاتبه رقم موبايلها على كل البنشات الى فى الكليه
البنت : خلاص بكره هشوفك قبل المحاضرة اعطيهملك
الولد : بس انا مش هعرف اجى قبل المحاضره ممكن اشوفك بعدها
البنت : لأ طبعا مينفعش اصحابى ممكن يفتكروا فى حاجه كده ولا كده وعلى العموم انا مش بكلم صبيان بعد المحاضره
وطبعا لتانى مره بتشتغله
وفى اليوم التانى
الولد طبعا جه بدرى و ضارب علبه الجل كلها على شعره وموقفه اسبايك وحاطط البرفان ولابس الحته الى على الحبل ومفهم كل اصحابه انه رايح معاد مع بنت جديده لسه متعرف عليها امبارح
اما البنت فقالت لاصحابها انه قعد يتلحى عليها علشان تديله المحاضرات وهيه هتروح تديهمله بسرعه وهترجعلهم على طول وده طبعا لما لقوها متزوقه ومتمكيجه
وحصل الى حصل فى اليوم التانى وهو كالاتى :
الولد : شكرا جدا على المحاضرات دى على فكره خطك حلو اوى
البنت : ميرسى ده كله من زوقك
الولد : طيب ممكن اعزمك على كانز علشان انا عطشان مووووووت
البنت : لأ شكرا والله لسه ضاربه كشرى مع اصحابى عند الحجاز
الولد : خلاص يا سيتى انا حلفت
البنت : اوكى ماشى بس بسرعه علشان اصحابى مستنينى
الولد : اوكى على طول والله
وطبعا شربوا الكانز وقعدوا 5 ساعات فى الlove street واتكلموا فى كل حاجه وطبعا لعبوا لعبه الصراحه الى كلنا لعبناها قبل كده ومع انها اسمها الصراحه انما كله بيكذب فيها
المهم ما علينا
وبعد 50 او 60 معاد من دول هيحصل الحوار الى جاى
البنت : ...... انا عوزاك تبطل السجاير
الولد : خلاص والله علشان خاطرك بس ممكن اشرب كل يوم كام سجاره كده بس لحد ما اعرف ابطلها
البنت : لأ ولا حتى سيجاره واحده
الولد : طيب علشان خاطرى انا مش هعرف ابطلها فى يوم وليله بس طول ما انتى معايا اكيد هعمل علشانك المستحيل
وطبعا الولد ولا بطل السجاير ولا بتاع ولا هيه اساسا يفرق معاها الموضوع ده فى اى حاجه بس قالتله كده علشان بتسمع اصحابها بيقولوا كده لل boy friend بتاعهم علشان يحسسوهم انهم بيخافوا عليهم وعلى صحتهم
وطبعا قالتله متكلمش بنات ولا تهزر مع بنات والواد فاكرها بتغير عليه بس طبعا هيه عايزاه ميكلمش بنات علشان محدش يقولها انه بيعرف بنات كتير غيرك وطبعا ده اكيد محرج لاى بنت
وبعد 50 او 60 معاد من دول ويا عينى الواد قاعد بيسمع كلامها فى كل حاجه حصل الحوار الاتى بعد ما غلبت تتطفشه ومعرفتش لأنه بجد بيحبها
وفى يوم من الايام وبرضه كانوا بيلعبوا لعبه الصراحه سألته
البنت : انت بتحبنى ؟؟؟
الولد : طبعا انتى كل حاجه فى دنيتى
البنت : وبتخاف عليا ؟؟
الولد : اكتر من روحى
البنت : على فكره انا مش ينفع معايا الكلام ده انت لو عايز تكلمنى يبقى لازم يكون فيه ارتباط رسمى بينا
الولد : والله انا عاوز كده برضه بس انا مش هينفع اتقدم ليهم فى البيت وانا لسه طالب
البنت : خلاص مش هينفع نشوف بعض الا لما تخلص
الولد : لأ انا مش هقدر ولا انتى هتقدرى
البنت : لأ انا هقدر
الولد : بجد ؟؟
البنت : اه بجد
وفى لحظه انتهى الموضوع بالنسبه للبنت وده طبعا بعد ما الولد اتعلق بيها وصرف دم قلبه وقلب امه واصحابه علشان كل يوم يعزمها على كانزات وباجيت وشيبسى وهدايا وورد
بس على فكره البنت دى عندها حق لأنها بتفكر زى اصحابها الى قالولها
يا بنتى متضيعيش وقتك وعمرك مع واحد بس غيرى بقى غيرى
والسؤال الى انا عاوز اسأله
ايه هوه السبب الى خالاها تكلمه فى الاول وبعد كده سابته ؟
هقولكم انا الاجابه
ده طبعا علشان فى واحد تانى طلب منها المحاضرات وبصراحه الولد التانى ده كان اشيك واوسم منه